البوست ده لاطفال السبعينات ومراهقي التمانينات بس!
– الناس اللي اتربت في بيوت مصرية عادية اودتين و صالة بالكتير و لا فيه كمباوندز و لا بتاع
– اللي فيهم غني دخلوا مدارس لغات أو تجريبية مصاريفها بالكتير 2000 – 1000 جنيه في السنة و لا انترناشيونال و لا Supplies و لا بطيخ
– لما كان أقصى طموح لينا هي خروجة Wimpy
– لما كنا بنلعب فى الشارع و بنلعب مونوبولى و بنك الحظ و Scramble و السلم و الثعبان
– لما كان المصيف ال Cool الوحيد هو المعمورة او العجمي بيطاش، و بيانكي اللي كان بيضم أحلى بنات مصر، وشارع الحنفية و Paradise
– لما كان الفجور إنك تسهر في Summer Moon في العجمي
– مكنش فيه فورمة ساحل و لا فاشونيستاز ع البحر
– أيام نوادى الفيديو و البلياردو و ترابيزات البينج بونج فى كل حتة و الأتارى و الفيديو جيم
– لما كان فيلم الكاميرا 24 أو 36 صورة، ونصه بيتحرق علشان الضلمة و لا كان فيه سيلفى
– وكان كل يوم الخميس بالنسبة لنا عيد
المسلسلات الاجنبية الجامدة
Night Rider..Falcon Crest..MacGiver..
Knots Landing
– بوسترات أوضة النوم كانت Stallone..Arnold..Madonna..
Bruce Lee…بيبو..عمرو دياب..Maradona فؤاد
– أيام كمبيوتر صخر والديسكات 3.5"
وأفلام السينما للبنات : Pretty Woman – Scent Of a Woman
وأفلام السينما للولاد : Rocky 4 – Commando – لا تراجع ولا استسلام لفان دام
وأيام لما نص الشباب المصري المراهق أعصابه تعبت من كتر البحث عن فيلم
Indecent Proposal Uncut و Basic Instinct
علشان اللقطة اياها 😊
– أيام التليفون اللي بقرص اللى لونه رمادى فاتح
والعيلة الجامدة عندها تليفون لاسلكي وده طبعا في أوضة نوم بابا وماما بس
ولما يبجي تليفون انت مستنيه يبقى كل همك تعرف إذا كانت ماما رافعة السماعة من جوه ولا لأ
– لما كنا بنزهق واحنا في البيت فنتصل ب 15 علشان ترد علينا الست بتاعت "الساعة الآن السادسة وخمس وعشرون دقيقة وثلاثون ثانية"..نقوم جايين قافلين ومتصلين تاني بسرعة نلاقي الفرق 10 ثواني بين المرتين
– لما كنت تحب تبعت صورة لأى حد من قرايبك عايش برة تحطها في جواب أو تسجله على شريط كاسيت أكنك بتكلمه و يوصل بعد 3 أسابيع
– لما كان أي حد بيجي من السفر العيلة كلها تطلع على المطار قبل ميعاد الوصول بساعتين
لما كانت الكوكاكولا بـ 15 قرش والبوزو بـ 5 قروش وكان المصروف اليومي نص جنيه بالكثير و اللى كان بياخد جنيه ده كان إبن الناس اللى فى الشلة
– أيام اللبان السحري اللي بيتغير لونة في البق
– أيام الجينز الليفيز 501 لما كان في عزه و تيشيرتات الWinner السادة اللى كنا بنطبع عليها Iron Maiden و Metallica
– إعلانات concrete و كيمو كونو و سر شويبس و صوت طارق نور
– أيام مزيكا حميد الشاعري و إنه كل سنة يطلعنا مغني جديد فى الصيف
أيام شرائط كاسيت لقاء النجوم وهاي كواليتي
– الأغانى الenglish يعنى
MJ .. Sandra .. Ace of Base
و العالم يغنى و برنامج هالة حشيش فى الراديو
– كانت أكثر أغنية صايعة عندنا "ايه الأساتوك ده" لحمدي بتشان و شريط سحر حمدي
– أيام اخترنا لك كل يوم أربع ونادي السينما يوم السبت و عالم البحار – أماني وأغاني – سر الأرض – الكاميرا في الملعب – عالم الحيوان
– السينما يعنى التحرير و واقفين طوابير عشان فيلم عادل إمام الجديد
– لما كنا نسافر بورسعيد نجيب الشوكولاتة و الشامبوه و بنطلونات Sonnetti و جزم Reebok و Activ من أبو علاء أو عطعوط
– أيام فرحتنا بوصول مصر كأس العالم سنة 90 وطبعا بجول مجدي عبد الغني
– أيام أول موبايل Nokia سنة 1996 و خط الموبايل لما كان 1700 جنيه و لما نزل أول خط كارت من كليك
والله عيشنا أيام حلوة برضه و كنا حقيقي مبسوطين❤️❤️❤️
اخبار النادي الأهلي المصري اضغط هنا
معلومات طبية و دليل الأدوية اضغط هنا